Өнөөдрөөс улс, хот хоорондын зорчигч тээвэр, суудлын галт тэрэг болон орон нутгийн хуваарьт нислэг, тээврийн хэрэгслийн зорчих хөдөлгөөн нээгдэж байгаатай холбогдуулан Дорнод аймгийн Авто тээврийн төв хуваарийн дагуу ажиллаж байна.

Өнөөдөр 2020.03.03-ны өдрийн байдлаар өглөө 08 цагт нийт 4 автобус-195 зорчигч, 13 цагт 1 автобус 45 зорчигч, Улаанбаатарын хотын чиглэлд хот хоорондын тээврийн үйлчилгээ үзүүлсэн байна. Орой 18 цагт 1 автобус явахаар төлөвлөгдсөн, иргэдийн захиалга нэмэгдвэл шаардлагатай тохиолдол нэмэлтээр автобус гаргах боломжтой гэж аймгийн Авто тээврийн төвийн дарга Ц.Мөнхтөр мэдээлэл өгсөн юм.

Үйлчилгээний заал болон тээврийн хэрэгслийн халдваргүйжүүлэлт тогтмол хийж, тээвэрлэлт эхлэхээс өмнө зорчигчдын биеийн дулааныг хэмжиж, ариутгалын бодисоор ханган ажиллаж байна.

Дорнод аймгийн Авто тээврийн төв нь  иргэдийнхээ ажил амьдралын шаардлагад нийцүүлэн Чойбалсан-Улаанбаатар хотруу зорчих нийтийн тээврийн хэрэгслийн хөдөлгөөнийг өглөөний 08, 13, 18  цагуудад явуулж үйлчилгээ үзүүлж байна.

Улаанбаатар хотын чиглэлд Ай СВН ХХК, Атибус ХХК-ын 45 хүний суудалтай автобус том хүн 34200 төгрөгийн төлбөртэйгээр үйлчилж байгаа бөгөөд иргэд та бүхэн цахимаар тасалбараа захиалахыг хүсвэл https://eticket.transdep.mn/ цахим хаягаар нэвтэрч захиалгаа өгөх боломжтой юм.