Төрийн албаны ерөнхий шалгалт энэ сард зарласантай холбогдуулан Төрийн албаны зөвлөлийн Дорнод аймаг дахь салбар зөвлөлийн Нарийн бичгийн дарга Э.Нандин-Эрдэнэтэй энэхүү шалгалтын талаар ярилцлаа.

Сайн байна уу? Өнгөрсөн жил Төрийн албаны тухай хууль шинэчлэгдэн батлагдсан энэ хуулийн дагуу хэдэн шалгалт авдаг болсон бэ?

- Монгол улсын Төрийн албаны тухай хууль шинэчлэн батлагдаж 2019 оны 01 дүгээр сарын 01-ний өдрөөс мөрдөгдөж эхэлсэн. Өмнөх хуулинд төрийн албанд орж ажиллах иргэн төрийн жинхэнэ албаны мэргэшлийн шалгалтад ордог байсан бол шинэ хуулийн зохицуулалтаар ерөнхий шалгалт болон тусгай гэсэн хоёр шалгалт өгдөг болсон.

Шалгалт хэзээ зохион байгуулагдах талаар хугацаа тов гарсан уу?

Төрийн албаны хуульд заасны дагуу ерөнхий шалгалтын бүртгэлийг улсын хэмжээнд  зарлаж 2020 оны 09 дүгээр сарын 14-ний өдрийн 14.00 цагаас эхлэн 2020 оны 10 дугаар сарын 14-ний өдрийн 14.00 цагийн дуустал нэг сарын  хугацаанд улс, орон даяар цахимаар бүртгэл явагдана. Цахим бүртгэл нь төрийн албанд орж ажиллах хүсэлттэй иргэн биеэр ирж бүртгүүлэх шаардлагагүй, интернеттэй бол хаанаас ч хандан бүртгэлд хамрагдах давуу боломж бий болсон.  

Ерөнхий шалгалт болон тусгай шалгалтын ялгааны та тайлбарлаач?

- Өмнө нь бол Төрийн албаны хуулийн хэрэгжилтээр төрийн жинхэнэ албаны шалгалтыг өгч шууд албан тушаалд томилогддог байсан. Тодруулбал Боловсрол, мэргэжил, ажлын туршлага шаарддаг байсан бол ерөнхий шалгалт нь төрийн албанд ажиллах сонирхолтой иргэн бүр хамрагдах боломжтой шалгалтад тэнцсэн иргэн 3 жилийн хугацаатай нөөцөд байна.

Харин тусгай шалгалт гэдэг нь нөөцөд орсон иргэн боловсрол, мэргэжил, туршлага таарч байгаа иргэн тусгай шалгалт өгч тэнцсэн тохиолдолд тухайн албан тушаалд шууд томилогдох боломж бүрдэж байна гэсэн үг юм.

Ерөнхий шалгалтад орохын тулд тухайн иргэн ямар болзол хангасан байх ёстой бэ?

 
1.Монгол Улсын иргэн байх
2.Дээд боловсролтой байх 
3.Эрүүгийн хуульд заасан авилга, албан тушаалын гэмт хэрэг үйлдэж шүүхээр ял шийтгүүлж байгаагүй байх
4.Сэтгэцийн өвчин эмгэггүй байх
5.Цэргийн алба хаасан байх
6.Тухайн орон нутагт төрийн жинхэнэ алба хаах хүсэлтэй байх
7.Тэтгэвэр тогтоолгох насанд хүрээгүй байх
8.Төрийн албанд эргэж орох эрхгүйгээр хугацаа зааж халсан бол уг хугацаа дууссан байх
9.Эрүүгийн хуульд заасан гэмт хэрэг үйлдэж шүүхээр нийтийн албанд ажиллах эрх хасах ял шийтгүүлсэн бол уг хугацаа дууссан байх ёстой. Эдгээрийг хангаж буй иргэн бүр дээрх шалгалт өгөх болзлыг хангаж байна гэж үзнэ.

Бүртгүүлж байгаа иргэд юунд анхаарах ёстой бэ?

Төрийн албаны ерөнхий шалгалтад бүртгүүлж байгаа иргэд маш хариуцлагатай хандах хэрэгтэй. Өмнөх шалгалтад бүртгүүлсэн иргэдээс бүртгэлээ дутуу хийх, төлбөрөө төлж  баталгаажуулаагүй тохиолдол их гарч шалгалтад орж чадахгүй болж байсан. Бүртгүүлэгч төлбөрөө төлсний дараа код ирж бүртгэл баталгаажсан байх тул үүнд анхаарах хэрэгтэй.

Монгол Улсын Төрд ажиллахаар шийдэн Төрийн албаны шалгалтад оролцох хүсэлтэй иргэдэд зориулж Төрийн албаны зөвлөлөөс цахим ном, сорилыг бэлтгэн  өдөр бүр шинэчлэж байгаа тул иргэд бие даан суралцах боломж нээгдэж байгаа.

Иргэд Төрийн албаны Ерөнхий шалгалтын зарын талаарх дэлгэрэнгүй мэдээллийг доорх сайтуудаас авах боломжтой. http://csc.gov.mn/, http://dornod.gov.mn/ Ерөнхий шалгалтад орж байгаа иргэддээ амжилт хүсье.