Өнөөдөр Мэргэжлийн хяналтын газар шинэ барилгын шав тавих ёслол боллоо. Шинээр баригдах барилга нь Олон улсын стандартын шаардлага бүхий лаборатори болон оффисын барилга бөгөөд улсын төсвийн хөрөнгө оруулалтаар 6 дугаар багийн нутаг дэвсгэрт баригдах юм. Барилгын ажлыг “Их Базар констракшн” ХХК гүйцэтгэнэ.

Мэргэжлийн хяналтын газар нь 4 хэлтэс, хяналтын итгэмжлэгдсэн лаборатори гэсэн бүтэцтэй, 72 ажиллагсадтай үйл ажиллагаагаа явуулж байна. Одоо ажиллаж байгаа барилга нь 1968-1969 оны Дорнод аймагт ажиллаж байсан ОХУ-ын ажилчдын эмнэлгийн түр барилга бөгөөд ашиглалтын чанар, аюулгүй байдлын шаардлага хангахгүй боловч МХЕГ-ын болон орон нутгийн төсвөөс тодорхой хэмжээний хөрөнгөөр 2 удаа урсгал засвар хийж, 2016 онд Уламжлалт анагаах ухааны төвийн хуучин барилгыг өргөтгөн үйл ажиллагаа явуулж байсан юм.